BİRA KOSEY


7 Haziran 2012 Perşembe 00:00
Kéyéno bol niçar beno, camérdé né kéyira hend karé nino. Rojé deha cénék damış nébena u qahréna, mérdeké xüré vana kı:
_ la mérdek no wına do deha nı ravéro, ya tı şıné kar nan u şami ané né kéyi yana zi ezo şır ké pırandé xü
Mérdek wınéno cénék vatışté xüd raştase, kewno ray şıno şuwanin
No mérdek şıno şuwaninse xeylé uja maneno, wahdok şawanind benose welaté cıd zi bol çi vıréno. Çend mengi şuwanin dıma xüré ıstoré u tıfıngi herineno u kewno ray keno biro welaté xü u keyedé xü.
Çend roja dıma no mérdek reseno sukta welaté xü, ujad dineno ké masey roşéné, u gané cı masey wazeno, xüré buxü vano ké
_ vındık ez çend kiloy masey zi biyer wa cénék no şand wıni weş maré né masa vırazo mazi buré
Uza çoşmand merdıma xapınayış u çi tırawtışt name kerdo hiré bıra kosey ronıştibi, no mérdek wahdok masey herineno se é ey dinené
Ninara jew vano kı
_ bırayéno ez nıka şena né merdımira é masa biyer
Juna vanok
_ eger tı bışé masa eyra biyeré se ezi şena ıstora cı biyer
O bin zi vanok
_ bıra eger tı bışé ıstor eyra biyeré se ezi şena tıfınga ey cıra biyer
U kewné mérdeki dım, bıra kosanra jew şıno reseno mérdeki u vanok
_ oxürbo dezayé mı 
_ ela razibo, torézi oxürbo
_ tiyé ela zano newe karra yené, tiyé şıné vera koti?
_ e wıl deza bı çend mengi ez şibya şuwanin, ma xüré gürwéyay u eza şına fılan dew
_ dezay mı ezazi şına a dew, ma xüré piya embazey bıkaré, nı beno?
_ beno çı né beno
Bıra kose vanok
_ ey wınise kani é çiyok naylond bıd ramı, tıfınga todır gırana
Mérdek zi gıno masa dano raçı. Tayn piya ray şıné no bıra kose rayşiyayışé xü keno gıran, wınénok mérdek tam kewt verni u şeno şopa xü vınikero se, hema küçi tadano xü keno véni
Mérdek xü peyni wınénok embazı cı çınyo, aşt wınéno naşt wınéno çınyo. Na fın bıra kosoyo bin şıno het
_ seb deza tiyé wéni aşt naşt wénéné?
Mérdek vanok
_ la pers mek deza, newe merdémé ama mı het va ma piya şéré u masé mı mı destra géroti u bı vıni
Bıra kose vonok
_ mı dina no küçera ageyra, tı ecela bıkerése resené cı
Mérdek keno ra dımkowose, bıra kose vanok
_ tı a ıstora xü bıd ramé, ıstordo to yavaşkero ez tiyad vındena to,
Mérdek gıno ıstor dano ra bıra kosey u küçok mojneno çıse remeno vera uza. Bıra kose gıno ıstora xü gıno u küçenera sopa xü keno vıni.
Solıxna mérdek yenok, çı yeno ne mérdeko ne ıstora, şaş beno. 
Nafın bıra koso hirén şıno het
_ xeyro deza, sebiyo tiyé şaş, şaş aşt naşt wınéné?
_ la deza pers mek ez şaş biya, veri jew ama mı het va ma piya ray şıré mıra masé mı gıroti u xü kerd vıni, dıma jewna ama mı het va ıstora xü bıd ramé é merdımi dım kew, mızi ıstor dé racı ez kewto merdémi dım, na fın ez amayak ne merdım esto nezi ıstor
Bıra kose vanok
_ ıstoré to sur bé?
_ e sur bé 
_ a newe no küçera nıştıb çı u şiyé, acele bık tı resené cı
Mérdek keno radım kewose, bıra kose vanok
_ deza tı kené a tıfınga radım kewé? Eger o merdım a tıfıng todır bıdinose o do vazok tiyé kené ey bıkışé u o do nıvındero. Tı en rındiya cı a tıfıng bıd ra dezadé xü ez tiya vındena to hema şori ıstora xü bi u béri
Mérdek gıno tıfıng dano bıra kosedé bini u kewno ra ıstor dım, la ne mérdeko nezi ıstora, aşt doş beno naşt doş beno çınyo. Dıma yeno cadé xü kı tıfıngzi çınya. Sekero şaş beno o küçe no küçe geyreno kesi nédineno. Teseliya cı kewna u kewno ray şıno ké xü
Vera şané reseno kéye u ewro çıçi seredé cı sera ravérenose heme çi cénékeré vano. Cénék fatışa pérın goştarey kena, mérdek vatışi qedénenose, cénék vana kı
_ ez zana é kami, é no bahdoyand seredé millet sero biyé belay, inanré vané bıra kosey.
Dıma ageyrena mérdeki ser u vanak
_ mérdek ma fen u xapınayışı ina tenya esto. wa şewrabo ma piya şıré suk tı mıré katlıxé çınayo weş bıherin ez wıni fenéna weş biyar ina sere
U cénık fenak kewna seredé cıse péroy mérdekiré vana, na fen kewna mérdeki zi sere
Beno şewra wırna piya kowné ray u şıné suk, veri şıné dukandé çınay ser mérdek cénékeré qatlığı çınaw weş u çıté qonderey géno. Dıma cénék vanak
_ na fın é merdémi kotibise mı ber uza 
Mérdek u cénéka kawné ray şıné mıntıqada ina. E, mérdek wınénok é hiré hemey uza ronışté, vanok
_ A cénéki ı merdémi éyé
_ E, é tam bıra kosey, mérdek tı inara maas eza şına ina het
U cénék şına ina het, resena cıse vanak
_ çağé şıma xeyrbo
Bıra kosey wınéné cénékra nésılasnené, vané
_ xeyr ameyé sılamet.
Cınék vana
_ ella zano şımayé mı nésılasnené
_ e welay mayé to nısılasnené
_ ma ez dedkeynaya şımaya, şıma seni mı nésılasnené?
Bıra kosey vınéné pıra, tayn şaş bené
_ hala hala heta néka ma qe tı nidinaya, tı seni dedkeynaya maya?
_Na mesela bol derga dezayıno, ma şıma qe névané na dedkeynaya ma sekena, se nékena, qe persé ma nékenné?
_ wıl tı raşta, hema xebera ma tora çınébi, hele vaj tı kotida, sekena?
Cınék vanak
_ welay dezayéno, ez keyed tenyaya, mérdekéné mı bıb, no çend seriyo şiyo kar u huna niyamo, a wıni ez tenya keyeda.
Goşé bıra kosa luenno, vané
_ ey tı mara çıçi vazena?
_ welay ez devıd tenyaya u dewıji vanık qey kesé mı çınyo, qandé coy çımdé pisya wınéné mıra, ju fın béré vara ké mı wa isan vajo merdımé nayzi esté
_ beno dedkeyna vano jew ezo şewra bir kı to, tı kam dewda? 
Cénék cıré namé dew vana, u o jew vano ezo şewra bir. Cénék cıra xatır wazena u inara kewna duri. Şına mérdeki het vanak
_ no kar bı, mase kewt çenqal jewo şewra yeno.
Beno şewra cénék şamiyéna weş vırazena, roj yeno vera éreyı bıra kose aseno, mérdek tebera xu numeno. kéberi vero cénék bıra kosi paweno
_ tı xeyr amey dezayımı, tı xeyr amey vana
_ xeyri miyandbo dedkeyna.
Bıra kose xüdır bol çizi ano, şamıki, balcani, goşt bol çi ardıb. Cénék nı çi destı cıra gına u vanak
_ ravır zere deza, 
Bıra kose ravıreno zere u roşeno, xeylı qısey kené u vahde keno şanbo, cénék vana kı
_ dezayımı mado nıka nan buré, hema tı bol erqyayé, samki boya tora yena, bı mı toré aw kerda germ seré xü vini weş bışu u ma dıma nan buré
Bıra kose vano beno, cénék cıré aw bena serebi het u vanak
_ tı tiya seri bışu ezazi şami ronana
Bıra kose xü keno vıran dı tasi aw keno xura u kéber ceneyenno, cénék vana
_ o kama?
Tebera mérdeké cınéker vano
_ cénéki ez mérdé toya, kéberi ak
Bıra kose vanok 
_ o kamo? Cénék vana
_ welay mérdéké mına kar ra amo
Bıra kose vısıno,
_ ey ezo nıka seker? Cénék vana
_ hema şo dekew no kuwariyé xeli
Bıra kose hema vıran remeno, kuwari zere, cénék kéberi akena vanak
_ tı xeyr amey mérdek, tı heta nıka kotibi
_ xeyr amaya cénéki welay no çend seriyok ez şiya gürweyyaya u amaya
_ bı roş bowni mızi toré çı şamiya weş vıraşta, samki mı zanayé tıdo biré
Mérdekiyu cénékera roşené u nané xü weş wené, bırakose zi kuwarıd oyo tersanra lerzenno.
Mérdek nan weno u vanok
_ ey cénéki qe çı çi esto çi,çi çınıp çınıbiyayışté mıd? Cénék vanak
_ welay mérdek heme çi rındıp hema e no kuwariyé mayé xeli, ez çend xele dekenazi çend roja dıma beno veng,mı né zana çıçiraw
_ ey no kuwaré wınénose, tı çı çiré né kuwari zered verdana, bışkın wa şıro. Tı hela mıré é torzini biya ez ney leteker.
Cénék torzini ana mérdek, şıno vera kuwari torziné dano kuwarirose bıra kose vırtu vıran vıjıno orte. Mérdek vanok
_ la la cénéki kuwarıda mad şeytan esto, qandé coy xele nımaneno.
U kewno ra ser dano pıro, bıra kose aşt remeno, naşt remeno mérdek desté torzinya, dano pıra wıni weş dorpı kenose, cénék kıberi akena u bıra kose vırtu vıran remeno teber. Mérdek tana siyana kewno radım şewda tarid bıra kose xü keno vıni u remeno
Mérdekiyu cénékera yené zere u bol bol viyenné, cénék vanaké
_ mérdek ma jewira heyfé xü gırot mendi é dıdı
Mérdek vano 
_ mado é binara seni heyfi xü biyeré?
Cénék seri hél kena u vanak
_ é dozi biré
Bıra kose vırttu vıran şew xü resneno keye, beno şewra şıno xüré çınayéno qatlığéno weş dana vıraşten u şına bırarandé xü het. Bırayé cı çınayé newi sero dinenése, merak kené
_ bıra no çınayo wına weş to kotira ard?
Bıra kose vanok
_ qe pers mekeré bıraréno, ez vızır şiya ké dedkeynada maya. Vané
_ eee
_ a, ez şiyakı méré no çına dao deşten. Dedkeyna va ka dezayé mıné bini, mı va qey édozi rozna biré
O bin bırardé xüré vanok
_ ey qe wıni weş wınyé to, kimeté to zana?
Seri keno berz u vanok
_ bol weş wınyé mı, ez emşo ké cıd rakaewta.
É binarézi beno weş, inara ok ıstor tırawenose vanok
_ ey wınise nıka xatırdé şıma, ez şır tay xü hazırker ezi no şan şır ké dedkaynada ma
U verzeno şına çarşra xeylé çi géno u nışeno ıstor u doğrı şıno dew
Vera şané reseno dew, cénék bıra kosey dinena, mérdekiré vanak 
_ mérdek maséy mayo dıdınozi yeno, tı fına xü şo bınum ma neyzi fenrodé
Bıra kose yeno, cénék cı wıni weş meyman kena, beno şan kené nan burése kéber cenéyeno. Cénék şına kéberi peyni, veyndana
_ kamo?
_ eza cénéki, mérdéyo toya
Cénék ageyrena bıra kose ser vanak
_ ha ho deza, ma sekeré mérdeké mı ama, to na şew tiya bıdinose odo hım mı himzi to bıkışo
Bıra kose vıséno, vano
_ cayé çınyo ez xü bınum? Cénék hema vanak
_ tı hema dekew na béşik, to nayd nédineno
Bıra kose hema remeno u kewno béşik u betani erzeno xü ser. Cénék şına kéberi akena, mérdeké xü gına zere, nan vené u dıma, mérdek vanok
_ ey cénéki qe ez tiya nébiya, seb, seb nıb?
_ welay mérdek tı şi dıma maré ellay qeçeké da, a mayé wini xü ver dana
_ hele qeçeki xü ez bédin senino. Cénék vana
_ oyo béşikdı. Mérdek şıno béşik het betani hewadanose bıra kose xü tut keno, mérdek veyndano cénéker
_ la cénéki hele hadé, né zımbélé lajekté ma amayé, tı hele méré uzara cılété biya ez ney tıraşker bol eybo
Cénék cılét ana u bıra kosi traş keno, bıra kose xü leqnenose siléy kono pa u vanok
_ vındra qe né şermayeno, zımbélu herdişa cı pırdé cıra biya gırdéri,
Herdişu zımbila bolın antişa cıra cıkeno, dıma mérdek vanok
_ la cénéki né lıngu desté neyzi bol gırdi, uzara kardiyé biya ma dest u lıngané ney tayn werdıkeré 
Bıra kose wınénok kar çırugose werzeno u remeno, mérdek peyra tepéşeno u kıştırazi dano pıro
_ la la cénéki no qeçek fınınd bı gırd u oyo remeno
Bıra kose heta xü destra reynenose, çınay pıroy sere kené lete, ıstoru hemeçi uja verdano u fırtan fırti remeno
Beno şewra ozi şıno çınayéno qatlıxo weş herineno u şıno bırarandé xü het. O jew bıra cıré vanok
_ ey bıra qe dedkeynama seni vınyé to?
_ welay bol weş vınyé mırazi, mırı çınayéno qatlıx dab vıraşten, wıni weş wınyé mıkı herdişa mı fına ay traş kerd. Bol weş vınéna keşi ne dedkeynaya ma
Bıra kosoy bin vanok
_ ey na vınhénase ezi şır fıné nay het
U kewno ray şına çarşıra ozi xeylé çi gıno u tıfınga xü gıno u şıno dew
Cénék eyzi géna zere, beno şan, cénék nani ronana kené burése kéber ceneyeno, cénék şına kéberi ver u veyndana
_ kamo?
Kéberi peynira veng yeno
_ eza cénéki, mérdeké toya
Cénék ageyrena bıra kose ser u vanak
_ welay no mérdeké mıno, to tiya bidinose hım odo mı hımzi to cıkero
Bıra kose terseno
_ ey ma sekeré?
_ hema dekew külini bın wa to nédino
Bıra kose hema remeno külini bın. Cénék kéberi akena mérdek yeno zere nané xü wené, dıma mérdek vanok
_ ey cénéki no çent seriyok ez çınya qe çıçi esto, çıçi çınyo?
_ welay mérdek hemeçi rındo de, a no mırat küliné mad qe bereket çınyo, ez çend arış ana u kena dese dıma wınénak qediyay
_ hele tı mıré çıwiyé biya ma külini bınd bewniyé, beno qe çiyéno tede
Cénéker veri koliyéno qalın kerdıp hazır, ey ana, mérdek koli gıno u xü keno çewt wınonok e bıra kosi xü külind kerdo tut. Mérdek qireno
_la cénéki külindé ma bınd şeytan esto, qandé coy arışé ma qedéno,
U koli hevadano dano miyanade bıra kosiro, her fınak dano bırose bıra kosira qiri vıjéna. Zor xü erzeno kéberi peyni u téfıngo çiyé xü uza verdano remeno. Kéfé mérdeki yeno ca u eyu cénékera bol, bol viyené. Dıma cénék vanak
_ mérdek nıdo qandé heyfdé xü peyd ageyré, qandé coy ma gerok inaré fenna vırazé
Cénék solıxé dışılméşi bena u dıma vanak
_ şewra rew ma hewşta xüd mezelé aşané
U fena xü mérdekiré vana
Beno şewra bıra koseyo é hirın hérsbiyayışa qahved şıno bırarandé xü het. É, ey dinenése viyené. Şıno reseno çıse qahréno
_ la axmağé xüléno şıma no çıçib ard seredé mı ser, qe şımad asın çınıyo. Çénıker rezili ard mı seri ser
No bahdo héré hema çiyok amo seredé cı serze vané. Dıma vanék
_ ma gerok né heyfé xü ninara biyeré.
U beno vera şanse hiré hema kewné ray u şıné dew. Cénék raya cı pawena vınénak e éyé yené. Cénék mérdekiré vanak
_mérdek zek mı toré va vıni bık, hadé dekew mezel
Mérdek şıno kewno mezel, bıra kosey hırsbiyayéşa yené qéberi ver u cenené. Cénék bermiyayéşa kéberi akena. Huna ina çiyé nıvatose a vanak
_ dezayéno démek şımazi pey hesiyay, démek şıma dedkeynaya xü no zor durımd tenya néverdé u amey mı het
Bıra kosey çiyé fahm nékené, vanék
_ sebé?
_ ma mérdeké mı no vera şewra merd u ma hewşt kerd mezel
_ nı la? Vané
_ e welay, hele béré mezeldé çı ser, 
Şınék era raşti mezel oyo hewş, cénék vanak
_ şewrarak merdose mezeldé cıra boyéna bol weş yeno, hele zınciya xü dekeré na qül boy keré, dezayé şıma merdozi çı boy cıra yena
Bıra koseyo jew xü keno çewt u zinciya xü keno qül keno boy kerose, mérdek mezelra zinciya cı tepışeno u cılété erzeno cı u zinciya cıra tayn cıkeno. Bıra kose vırdna lepandé xüya zınci tepéşeno u xü hülo keno u vanok
_ uyyyy boya dezadé ma çı weşa
O bin vanok 
_ hele vınd ezi boy ker
Ozi xü keno çewt u zınci keno qülse, mérdek zınciya eyzi eni wıni cıkeno, o zi wırna lepandé xüya zınci tepéşeno u vanok
_ ahoooo, e welay boya dezadé ma bol weşa
O binzi, vano vınd ezi boy ker, eni ozi xü keno çewt zınci keno qülse, mérdek cılıt erzeno eyzi, u qiri kewna eyro
_ ahoooo zınciya mı cıbyé, ageyreno bırarandé xü ser u vanok
_ la şerefsızono no çı halıb şima ard ma seri ser
U uzara deha mérdek u cénékerré çiyé nıvané u kewné duri

YORUMLAR
Henüz kimse yorum yapmamış, ilk yorum yapan siz olun.
#
Kurumsal

İçerik

Gündem

Siyaset

Haberler

Yukarı Çık