Herê Xal Remî 

 15 Gulan Roja Roşané Ziwanê Kurdî dı Musabaqayê Hikeyayan Şaban Şenateş  Ez Bîya Hîreyîn (3). Kurdî /Dimili biwanê, binusê. Bimusé ü Bımusné. Hikayeya Xo Peşkeşê Vendekara Qena
 

Xal Rem xo zano nezano ney karî keno. Kardê xo ra zaf hes kerdê. Karê ci kolîrotiş bî. Her dé xoya şiyê daristan ra kolî arêdayê û ardê suke. Suke de ney kolîyan rotê. Pereyê ki qezenç kerdê û ê peran a qandê qêçan û keydê xo xerç kerdê. Karo ke kerdê bi zora îdareyê ci bîyê. La belê fina zî haldê xo ra razî bî. Tim û tim Rebbê alemînî rê hamd û şukur kerdê. Hero ke pîya şiyê kolî ardê namey ci Bozo bî. Sermayeyê ci  Bozo tenya bî. Zey qeçandê xo ya cira hes kerdê. Êm û awa ci zaf dayê ci. Dirbetê ci be derman nêverda yê... Xal Rem dostê Bozoy bi û Bozo dostê Xal Remî bi.  

Serrê Xal Remî ameybî çoşmêy şeştî. Porê ci û erdîşa ci bîbî sipe. La belê bedenê ci hewno xo ser o bî. Xurt bî. Hewna xo zey hîris sere vînayê. Nezdî yê çewres sero ke Xal Remî no kar kerdê. Dar û daristan ra weş fahm kerdê. Kamcî dar ra do koli bigîro, yan kamcî kolî perey kenê zaf zanayê. Millet rê kamcî wext kamcî kolî lazimê ey zanayê. Milletaki suke di bî kê rê kamci kolî çar û çilpî lazim bîyê keberê Xal Remî cenayê.  

Yev fin Bozoya şiye ko û kepira ser. Ko û kepira serra qandê werden kufkarikî arê kerdê. Wextok yaxerê wesarî varayê şiyê deşt û newalan ra kormît, axbandir û kengerî arêdayê. Na şênayi ya pîzeyê qeçandê xo mird kerdê. Bol fin şênayi berdê bazar di rotê. Pereyê ki kewtê ci dest ê peran a qandê kedê xo çiçî lazim biyê ey çî girotê. 

 Keybanûya ci namey ci Silt bî. Kuçeyo ki kê ci mandibî ey kuçedê embiryanen keybanuda Xal Remîrê watê Em Silt. Em Silt pancas û şeş sere bî. Vist serey bî ke Xal Remî ya jewjiyê bî. Em Silt hîris û şeş seryo ke qehr û kotikê Xal Remî ancena. La lebê veyşaney û mirdbiyey di, weşey û nêweşeydi tim û tim Remî ra hes kerdê. Xal Remî hiris û şes seriyo ki qet kastiya Silt ne tewnay bi. Wextok veyndayê Silt ci rê vatê keybanuya mi.  

Rojê Xal Rem û Em Silta qeçandê xoya nanê şani werdê. Şamiya ci eşkeneyê kerg û bulxul bi. Ci vero tayn do nanê tîr û piyazo vişk est bi. Em Silt û keynaya ciya gird sofrê hewada. Çay nabi soba ser. Zimistan bî. Tebera vewr varayê. Çim çimî nêvinayê.Teber serd û pûk bi. Xal Rem minderê xo sero ronişt û qûtiya cixaredê xo vet. Cixareyê pişt. Hewna cixareyê xo nacifiina bi keberê keyi ceneya. Xal Remî caye ra Em Silt caye ra keyneka pîl rê va: 

-Hele bewni keberi ra.  
Keyneka pil ode ra vijya û vera keberi şi. Xal Remî vengo pêta wa: 
-Eceb kamo no wext keberi ceneno? Xeyr bo inşallah.  
Em Silt tepsiya çay ardê Remî vero ronê û keynerda xurê vatê: 
-Kam ameyo keynêya mina delal? 
Keynek hendê dirê deqey dima kewt zerrê û perdê xurê va: 
-Piyê mino şîrîn. Kuçedo cerî ra Ap Sef o. Vano veynd piyê xo. 
 Xal Rem verişt pay û vera kêberî şi. Kêber akerde bi. Seni çime ci kewt Sefî va: 
-Sefo bira xeyro inşallah. No serd û pûk di boka silametey a.  
Ap Sefî va: 
-Xeyr o xeyr o Remo. Labelê zaf eceleyê mi esto. Gerek ti mi rê meşt qandê çogan a en tayn çewres pancas darî biyarê. Ez zana no serd û pûk di na tozlanêya vewr di şiyayişê to do zaf zor bo. 
 Xal Rem şaş mend bi. Hewna fektê cira qiseyê nêvijyay bi Ap Sefî fina qisey kerdi. 
-Meters Xal Rem. Ezo na qor qandê ê çogana di qati perey bida to. 
 Dima deste xu kerdi tunika çaketê xu û destmalê xo vet. Destmal mîyan di desteyê perey esti bi. Perey nîyamordî û tewrdê destmala day xal Remî. Xal Remî hewna perey nîyamordibî Ap Sefî riye xo tada û ray şi. Durî ra va xatirdê to bo. Ap Sef tozlanêya vewr mandi bi vinî. Xal Remî kêber girot û peyd ama oda. Hem şaş mend bî hem zî keyf kerd. Meşt şiro qandê çogana dari bişo baro beterê perey do cirê bimanê. Kêdê cirê no zimistan çiçî lazim bo do bişo bigîro. 

 Vengê Remî û vengê Sefî şîbî goşte Silt. Keybanuya ci Silt wa: 
-Remo Remo key to nêwederyo. No serd û puk di tîye senî şire daristan?
Remî doşê cinakda xu bi û va: 

-Ellah girdo. Şewra bo xeyr bo. Hele wa ezanê nimazdê şewray biwano. Seqam bikewo û vewr vindero ezo şira. Nê eger vewr nêvindero ezo nêşira.  

Soba vero ronişt û cixarêyê xu şimit. Dima werişt şî awdaz girot û ame nimazlix keynerda xo ra waşt. Keynaya ci şî tqa ra nimazlix vet û qandê pêrdê xu rakerd. Xal Remî nimazê yatsî kerd û dima nimazlix berd teqa de cadê cid rona. Xeylê wext dima Xal Rem cadê xu derg bi û kewt xeyala. Xeyalê ci û hewnê ci kewt pê mîyan. Çend saati rakevt fahm nêkerd. Wengê ezandê nimazdê şewray kevt ci goş. Ecele ecele werişt. Pencera ra winîya teber ra. Vewr vinderd bi. Kêfê xal Remî ame. Şi awdaz girot û nimazê şewray kerd. Keybanûya ci û keyneka ciya gird zi weriştî nimaz. Bahdê nimazi Remî vengêdo sista va Keybanûya mi.  

-Bewni vewr vinderda. Werz mi rê taşti amade ki. Ezo bahdê taşti ray kewa.  

Em Silt şi mezxen û taşti amade kerd. Sînî ser o tayn penir, torax, nanê destekî û çay ard. Keyneka ci kolî kerdi soba mîyan û soba racifnê. Keynek va: 
-Dayê ezo kena şira rakewa. Em Silt Va: 
-Keyneka mina delal şo ti şo fina rakew. Keynek doşê perde xo bi û va: 
- Pîyê mino hêja. Raya to akerde bo. Ellah tevrdê kardê to bo. Ap Remî bahdê vatenda keynerda xo va: 
-Amîn.  
Ap Remî zi keynerda xo rê va: 
-Şo rakew keyneka mina xasek û delal.  
Em Silt şî pencera ra fina winya teber ra. Vewr vinderd bi. Amê doşîda raştê Ap Remîdi ronişt. Ap Remî çayê xo rê çayê Keybanûya xo rê ke pir. Wirdinan pîya taştî kerd. Ap Rem werişt pay şi odedo bîn ra torzînê xo, dahriya xo û qirmeliya xo ard. Di şêritê pêti zî inan het ronay. Em Silt tayn nan û tayn patateyê xaşeynayey kerdi tewredê Remî mîyan. Ap Remî çiyê xo girot û şî axur. Axur ra here xoyo Bozo vet. Tevrê paîtida Bozoy ser o şidêna. Em Silt keberê kuçi akerd. Ap Rem û Bozoya vijiyay teber. Em Silt qandê mêrdedê xo duay kerdi.  

-Ya Allah ya Fettah. Bê qeza bê bela. Kapîyê xeyri akerê şerri dafkerê. Dima Remî rê va. 
Xeyr şo xeyr be inşallah.  
Ap Rem doş bi û va: 
-Siltê xatirdê to bo.  
Rem û Bozoya kewtî ray. Dadesna deqey suk mîyan ra vijyay teber û verê xo da vera daristan.  
Seqam kewt bi. Hewna şewqê roji çine bi. La belê kesi fahm kerdê ki gamna tijiya akewo û teyr û tur, kerm û kêzikî do werzê. Vera rayda daristan catrayê estbi. Xal Rem û Bozoya resay bi çatray. Çatray tepya bê dar û heywanan qet kes çiniyo. Xal Remî cixareyê acifîna. Raya ci hewna derg bi. Daristan mîyan ra destê raştî ra vera qulbe rayenda teng estbi. Xal Remî verê Bozoy tada a ray. Bozo verd di Xal Rem peynî de demeyê bê veng ray şi. Bozo çalê vero vinderd. A deqa durî ra vengê zurayişê verganê ame. Bozoy xu peyd ant. Xal Remî va: 
-Bozo Bozo meters no vengê verganê bol durî ra ame. Raya ma tayn menda. Ti qet meters û bizan qirmeliya mina mi de. Çahar derbê ci zi mi xu de ardê. 
 Dihîrê lepî ardî qulêmeqandê Bozoyro. Bozo fina kewt ray. Tayn tersê verganê kewt bi Xal Remî pize. Xal Remî xu bixu va. 
-Tersê verganê gerek ez xo pizera veja. Bozo ti belki zanê ê perey mi rê çend lazimiyê.  
Çend deqey yan çend saati yo ray şinê nino xal Remî vîri. Vengê verganê dihîrê finî pêsero amê goşê Xal Remî. Wengê verganê bol amebi nezdi. Cayê ra serdê vewrer, cayê ra tersê verganê û eksiyayişê Bozoy. Xal Rem qebûl bi peyd şiro suk. La belê vaj ki resaybi cadê çoganê. Finê ra Bozo hol bi. Vergi bê veng û bê sewt finêra ci vero vijyay. Xal Remî dest çeke qirmelî û qirmelî finê vera hewa teqna. Vengo qirmelî ra vijya bi ey vengiya Bozo rema . Di vergi kevti Bozoy dim. Yew verg coşmedê xal Remî mend. Xal Remî derbê qirmelî tunik ra şelvarandê xo ra vetî. Tersê verg û serdan ra destê xal Remî hezêyay. Derbê qirmelî ci dest ra kevti vewr man. Xal Rem'î vewr manra destê xo geyrnay û derbi vînay. Vergok Xal Rem'î het bi ey zî verexo vera Bozoy da. Bozo ray ra vijya. Ray ser o vewr tayn bi. Cayo ke Bozo rema vewr çekerdê saqe. Vergî resay Bozoyi. Yew vergi xo pey ra çekerd Bozoy ser û palisteyo çep ra tepişt. Yev vergi xo çekerd mildê Bozoy. Bozo vewr ser o guna erro. Wevra sipi gûni mîyand mend û bi sur.  
Çime xal Remî zaf tersay. Yan vergi vera ey zî bidê. Gûni, perey, çogani...Xal Rem qîja...         Em silt finê ra werişt. Cay mandi Remê ciyo seni qîreno û naleno. Em Silt veynda Remî. 
-Remo hele werz werz. Tîyê hewn vinenê. 
 Xal Rem hewn ra werişt. Ariqî mîyan di mendbî. Winya çoşmedê xora. Cadê xo mîyand bi. Keybanûyaci ci hetbi. Doşê Silt bi û va: 
-Siltê Siltê hewno xirab mi vîna. Vergi kevt bi ma ver û Bozoyê mi werdê. Eeeee eeee. Verêna vatê. Hewn qilawuz o. Di quruşî vêşî deyeno qandê ê di quruşa insan gerek hend temahkar nêbo. Ezo nêşira daristan. Mi rê no kar lazim niyo. Wa vergi Bozoyê mi newerê. 
 Dima ey û Silta werişti nimazdê şewray… 
 30 Nisan 2025 
Cemil Yeşildağ